Nýlega fylltust allir fréttatímar af fregnum um „mörg smit“ í samfélaginu. Spítalar væru að taka upp sóttvarnaraðgerðir: Grímur, takmarkanir á heimsóknartíma, einangrun deilda og löng veikindaleyfi starfsmanna. Tilkynnt var að byrjað verði að sprauta á ný í haust. Ekki yrði þó gripið til almennra samkomutakmarkana.
Ekki brugðust blaðamenn við með hneykslun og gagnrýnum spurningum, sem hefði þó verið viðeigandi. Fjöldi rannsókna hefur í langan tíma sýnt fram á að grímurnar, sprauturnar, lokanirnar, takmarkanirnar, samkomubönnin, lokanir á fyrirtækjum og skemmdarverkin á skóla- og félagsstarfi barna hafði ekkert upp á sig og voru lækning verri en sjúkdómurinn.
Blaðamenn hafa lagt mikið á sig til að hunsa slík – raunveruleg – vísindi að því marki að tala mætti um þöggun. Enginn hefur lagt á sig uppgjör við veirutíma og hið sama má segja um þingmenn sem hafa reynst verri en engir.
Þess í stað er látið eins og að fálkaorðuhafarnir, og arftakar þeirra, hafi gert allt rétt, bjargað lífum og eigi enn að fá aðgang að hljóðnema. Rök mætti færa fyrir því að aðgerðir veirutíma þurfi að gera upp eins og sakamál, en þess í stað er látið eins og þær hafi verið það besta sem völ var á.
Það er verið að moka yfir mistökin og gera það fyrir allra augum.
Í mér blundar sú von að einhver sagnfræðingur sitji nú við skrif og taki saman þessa tíma eins og margir þeirra gerðu í kjölfar fjármálahrunsins 2008. Bækur þeirra um veirutíma hafa með óyggjandi hætti afhjúpað mistök, spillingu, hagsmunaárekstra stjórnmálamanna og almennings, svik á almenningi og skuggalega samninga sem ekki var talin ástæða til að sýna þeim sem áttu að borga brúsann.
Veirutímar eru vafalaust fullir af svipuðum beinagrindum í skápnum.
Augljóslega ætla yfirvöld ekki að stofna neina rannsóknarnefnd til að rannsaka sjálf sig. Hafa þó rannsóknir verið settar af stað af minna tilefni. Umframdauðsföll þjaka samfélagið, reikningurinn fyrir mistök yfirvalda er enn að stækka og margir munu aldrei bíða þess bætur að hafa látið sprauta sig, loka sig inni og flæma sig úr skóla.
Hér er lagt til að taka upp borgaralega óhlýðni ef yfirvöld reyna að ráðast á samfélagið í nafni sóttvarna aftur, og hæðast alveg rækilega að þeim sem endurtaka viskuorð falsspámanna veirutíma. Þannig hefur almenningi tekist að sigrast á mörgum lygasögum í gegnum mannkynssöguna.
Nema auðvitað að yfirvöld leggi í naflaskoðun, en höldum ekki niðri í okkur andanum.
