Greinarhöfundur t.h. ásamt Dr. Ludmillu Morozova-Roche og Dr. Aseem Malhotra
Dr. Aseem Malhotra er Bretum góðkunnur en hann var iðulega fenginn í sjónvarpsviðtöl sem álitsgjafi í framvindu faraldursins. Hann var einn af þeim fyrstu sem fagnaði covid-sprautunum opinberlega þegar hafist var handa við að fjöldabólusetja almenning og segist hafa þegið tvær sprautur í þeim tilgangi að vernda sjúklingana sína.
Algjör viðsnúningur hefur þó orðið á málflutningi hjartalæknisins og hefur hann ítrekað fært rök fyrir því sl. ár að stöðva eigi bólusetningar gegn Covid19.
Dr Malhotra var einn ræðumanna á vísindaráðstefnunni „Pandemic Strategies – Lessons and Consequences“ sem haldin var í Stokkhólmi nýverið og fjallað var um á Krossgötum. Í erindi sínu lagði Dr Malhotra áherslu á að greina frá vísindalegum rannsóknum sem sýna fram á aukningu á hjartasjúkdómum af völdum bóluefnanna og að ekki sé lengur hægt að fullyrða að áhættan á alvarlegum aukaverkunum sé minni en hættan á alvarlegum covid-veikindum.
„Akkúrat núna er stærsta áskorunin að tækla upplýsingaóreiðu sem tengist heilbrigðismálum. Ég tel að við getum gert það með því að styðjast við raunveruleg og sannreynd læknavísindi“, sagði Malhotra í erindi sínu og benti á að ótti geti staðið í vegi fyrir heilbrigðri skynsemi og að fólk eigi það til að sjá aðeins það sem það vill sjá en loki augunum fyrir öðru. Hann hafi sjálfur brugðist þannig við í upphafi faraldursins. Það hafi þó breyst eftir að faðir hans lést af völdum covid-sprautu samkvæmt læknaskýrslu.
Um miðjan janúar, aðeins viku fyrir ráðstefnuna í Stokkhólmi, hafði Malhotra komið fram í sjónvarpsviðtali á fréttastöðinni BBC og bent á að nýleg gögn sýni að sprauturnar geti valdið alvarlegum aukaverkunum hjá að minnsta kosti einum af hverjum 800 einstaklingum. BBC var harðlega gagnrýnt í kjölfarið af öðrum meginstraumsfjölmiðlum fyrir að birta viðtalið. Malhotra bendir á þetta og segir að þöggun sé einmitt hluti af vandamálinu.
Greinahöfundur náði tali af Malhotra eftir fyrirlesturinn í Stokkhólmi og spurði hvort hann hafi fengið einhver viðbrögð eftir viðtalið á BBC frá hjartalæknum og öðrum sérfræðingum. Hann svaraði að fjölmargir hefðu haft samband við sig og staðfest grun hans.
„Ég hef tapað tölunni á öllum þeim fjölda lækna sem hafa haft samband við mig og sagst styðja málflutning minn, þau viti hvað sé að gerast og séu óttaslegin. Þeirra á meðal hjartalæknar. Fulltrúar frá hjartadeildum á tveimur háskólasjúkrahúsum í London hafa haft samband eftir að hafa lesið greiningarnar mínar og staðfest að þeir sjái aukningu á hjartasjúkdómum. “
Málið sé þó flókið og ekki hlaupið að því fyrir hjartalækna að stíga fram með upplýsingarnar þar sem slíkt gæti markað upphafið á endalokum starfsferilsins. Ákveðin spilling eigi sér stað innan læknastéttarinnar sökum fjármögnunar hagsmunaaðila eða eins og Malhotra orðaði það: „Our position from invested interests needs to be overcome.“ Hagsmunir stjórni því hvaða vísindi fái vægi og hver ekki. Hátt upp settir hjartalæknar þurfi að gera málamiðlanir vegna hagsmunatengsla við lyfjaiðnaðinn samkvæmt Malhotra en lyfjafyrirtæki standa oft fyrir fjárveitingum, þróunar- og rannsóknarstyrkjum sem vísindamenn sækjast eftir.
„Ímyndaðu þér að allir hjartalæknar séu hluti af þessu kerfi þar sem eiginhagsmunir eru teknir fram yfir þarfir sjúklinga,“ segir Malhotra. Aðspurður hvort starfsferill hans sé nú í hættu svarar hann játandi en að hann telji mestu hættuna vera fólgna í þeirri ógn sem felst í því að læknar og yfirlæknar tali ekki fyrir málstað skjólstæðinga sína.
„Starfsheitið „læknir“ hefur glatað merkingu sinni ef læknar geta ekki lengur tjáð sig með hagsmuni sjúklinga sinna að leiðarljósi. Það er tilgangslaust fyrir mig að vera læknir ef ég get ekki lengur gert það sem ég er að gera.“
Heimildir:
Dr. Aseem Malhotra í viðtali við BBC
Viðsnúningur í málflutingi Dr. Aseem Malhotra í sjónvarpsviðtali á GB News.
Fréttamiðillinn The Guardian greinir frá gagnrýni á BBC
Pingback: Málfrelsið á gervihnattaöld - Krossgötur