Ný samtök vegna aukaverkana: Raddir sem ekki má þagga

Á Íslandi jafnt sem annars staðar ríkir mikil þögn um skaðsemi sk. Covid-bóluefna sem yfirvöld og fjöldi lækna hvöttu landsmenn til að taka. Samkvæmt óformlegri athugun meðal þeirra sem hlotið hafa skaða af sprautunum eru fáir læknar sem vilja tengja veikindin við sprauturnar, flestir segjast ekki hafa skýringu á veikindunum eða benda á aðrar mögulegar ástæður.

Segja má að óformlega hafi hérlendis verið starfræktur félagsskapur um hríð sem hefur reynt að brjótast gegn þöggun á aukaverkunum með ýmsum leiðum, t.d. með því að benda á lagasetningu Alþingis frá 2020/2021 þar sem samþykkt var að ríkið myndi greiða fórnarlömbum þessara nýju lyfja skaðabætur, þar sem lyfjaframleiðendurnir sjálfir eru lausir allri ábyrgð.

45 ára íslensk kona, sem í nokkur ár hefur starfað á Heilbrigðisstofnun Norðurlands (HSN) á Húsavík, sendi fyrr á árinu inn fyrirspurn á facebook hópinn Aukaverkanir eftir Covid-sprautu þar sem hún spurði hvort einhverjir hafi sótt um skaðabætur frá ríkinu. Konan sagði síðar greinahöfundi frá því að hún fengi engin svör frá Sjúkratryggingum varðandi sína umsókn. Umsóknin var send í ágúst 2022 og gagnaöflun lokið í október 2023.

Í stuttu máli, hafði hún sem starfsmaður HSN einfaldlega verið send í sk. bólusetningu í febrúar 2021, það hafi ekki verið neitt val „þar sem hún væri heilbrigðisstarfsmaður“. Konan hafði verið hraust alla tíð og engin lyf notað. Aðeins mínútu eftir sprautuna fékk hún alvarlegt bráðaofnæmi og í dag glímir hún við ýmsa kvilla, tekur fjölda lyfja og segist í raun vera „hálf manneskja“ miðað við það sem hún var áður. Hún hefur haldið áfram að vinna þó hún „þrauki varla daginn“.

Dropinn sem fyllti mælinn

Það má segja að þessi saga og þá sérstaklega framkoma Sjúkratrygginga, sem hafði m.a. borið fyrir sig manneklu, hafi verið dropinn sem fyllti mælinn hjá hinum óformlega félagsskap sem hefur látið sig þessi mál varða (á svipuðum tíma hafði ríkisstofnunin Seðlabankinn ráðið til sín loftslagssérfræðing svo dæmi sé tekið um ríkisstörf).

Ákveðið var að stofna formleg samtök fyrir þá sem hafa hlotið skaða af Covid-sprautum þann 26. maí sl. (Nafn samtakanna ákveðið á næstu dögum).

Bylgjan fjallaði um málið og tók viðtal við þá Gunnar Ársæl Ársælsson og Árna Frey Einarsson sem báðir hlutu hjartaskaða eftir sprauturnar. Eftir stofnun félagsins tók Bylgjan annað viðtal við þær Rebekku Ósk Sváfnisdóttur og Elínu Klöru Bender. Rebekka varð ófrjó eftir sprauturnar og Elín fékk aldrei aftur tíðarblæðingar. Gunnar, Árni Freyr, Rebekka Ósk og Elín Klara eru öll í stjórn félagsins.

Eftir að félagið var sett á stofn hefur fjölgað mikið í hópnum „Aukaverkanir eftir Covid sprautu“ og fjöldi manns hefur lýst veikindum sínum og vill slást í hópinn. 

Tilgangur félagsins er að sameina kraftana, fá umræðuna upp á yfirborðið, veita stuðning og upplýsingar, fá viðurkenningu á þessum alvarlegu kvillum og berjast gegn þöggun og hundsun heilbrigðisyfirvalda og stofnanna þeirra. Sömuleiðis fyrir því að ríkið standi við orð sín og greiði fólkinu skaðabætur samkvæmt lögunum. 

Það hefur nokkuð borið á vitundarvakningu um aukaverkanir undanfarið en greinahöfundur tók þátt í baráttufundi í Genf til að mótmæla fyrirætlunum Alþjóðaheilbrigðismálastofnunarinnar (WHO) um síðustu mánaðarmót. Um það var fjallað á Krossgötum í síðustu viku.

Jafnvel ráðamenn yfirvalda víðs vegar um heim hafa stigið fram með afsökunarbeiðni á hendur almenningi.

„Kollegar mínir í japanska þinginu eru verulega veikir eftir Covid-sprauturnar en þora ekki að tala um það.“ Þetta sagði fyrrverandi innanríkis- og samskiptaráðherra og núverandi þingmaður Japans, Kazuhiro Haraguchi, í sögulegum mótmælum í Tokyo

Haraguchi sagði sjálfur frá því að hann hefði þróað með sér ört vaxandi krabbamein eftir svokallaðar Covid-bólusetningar og hvatti fólk til að rjúfa þögnina, láta ekki þagga niður í sér.