Jóhannes Loftsson verkfræðingur var meðal þeirra fyrstu til að stíga fram og vara við fordæmalausum stjórnvaldsaðgerðum gegn kórónuveirufaraldrinum snemma árs 2020. Í sumar hefur Jóhannes birt flokk greina í Morgunblaðinu þar sem hann rekur upphaf og framvindu þessa máls. Krossgötur hafa fengið góðfúslegt leyfi til að endurbirta greinaflokkinn og hér birtist fyrsta greinin.
Þá liggur það fyrir. Ný skýrsla1) sýnir að þrír fyrstu covid-sjúklingarnir voru vísindamenn á Wuhan-veirurannsóknarstofunni. Einn þeirra, Ben Hu, fékk fjármagn frá bandarísku heilbrigðisstofnuninni (NIH) til að safna kórónveirusýnum frá leðurblökum um allt Kína og stökkbreyta veirunum. 2018 sótti rannsóknarstofan2) hans gegnum EcoHealth Alliance um styrk til bandaríska DARPA (Defense Advanced Research Projects Agency) til að stökkbreyta kórónuveiru svo hún yrði meira smitandi. Slíkur tilbúinn ofurvírus kallast á mannamáli lífefnavopn.
Þetta var því þeirra fé, þeirra rannsókn, þeirra vírus og þeirra starfsmaður. Hvernig gátu bandarísk yfirvöld verið svo grunlaus? Eða vissu þau kannski betur?
Bandarísk yfirvöld völdu að rannsókn á uppruna covid yrði stýrt3) af samstarfsmanni Ben Hu (Peter Daszak hjá EcoHealth) sem hafði alla hagsmuni að kenna ekki sér sjálfum um faraldurinn og varð því aðaltalsmaður þess að veiran hefði bara fyrir tilviljun birst í náttúrunni. Eftir að samskipti yfirmanns ofnæmis- og smitsjúkdómastofnunar Bandaríkjanna (NIAID) voru gerð opinber vegna upplýsingalaga, sást að í febrúar 2020 fóru hann og forstjóri NIH í samhæft átak til að „afsanna“ tilraunastofulekann. Þeir vísindamenn sem bentu á ónáttúru veirunnar fengu ýmist milljarðastyrki og breyttu um skoðun (sbr. Andersen4)) eða var ýtt til hliðar (sbr. fyrrverandi yfirmaður CDC5)). Facebook, YouTube og Twitter bönnuðu í heilt ár að tilraunastofuuppruninn væri ræddur á sínum miðlum. Eftir yfirtöku Elon Musk á Twitter kom í ljós að bandarísk yfirvöld höfðu beitt sér fyrir þessari ritskoðun. Í þrjú og hálft ár var logið að almenningi af yfirvöldum sem vissu betur.
Veigamesta sönnunin fyrir því að átt var við vírusinn er vírusinn sjálfur. Þetta sáu margir færustu vísindamenn heims strax og genaröðunin var birt. Átt hafði verið við svokallaðan furan-hluta í vírusnum sem ræður smiteiginleikum og hvergi í náttúrunni var slíka genaröð að finna. Eini staðurinn þar sem slíka röð var að finna var í einkaleyfi6) vegna bóluefnis sem Moderna sótti um 2016. Það ætti því engan að undra að það hafi aðeins tekið Moderna tvo daga7) að hanna bóluefnið. Það var hilluvara. Hilluvara þróuð í samvinnu við bandarísk yfirvöld sem kom í ljós þegar NIAID fékk 55 milljarða króna þóknun8) fyrir sinn þátt í þróun Moderna-bóluefnisins.
Í dag liggja því fyrir óyggjandi sannanir að bæði veiran og bóluefnið voru þróuð með þátttöku bandarískra yfirvalda löngu fyrir faraldurinn. Hvað gekk mönnum til og hvernig gat þetta gerst? Aðdragandinn er langur og verður hann rakinn síðar.
Stóra lexían fyrir Íslendinga af þessari lygi er að átta sig á því að þeir sem báru ábyrgð á þessum blekkingum voru notaðir af Þórólfi og íslenskum yfirvöldum sem fyrirmyndir í sóttvarnaraðgerðum.
Heimildir:
1) https://tinyurl.com/mfj4snhy
2) https://tinyurl.com/yv6ecncp
3) https://tinyurl.com/bdht5xfu
4) https://tinyurl.com/dnn9y5ej
5) https://tinyurl.com/25dnakuf
6) https://tinyurl.com/bddmcs2f
7) https://tinyurl.com/ytrw6c2c
8) https://tinyurl.com/2z437zyk
Greinin birtist fyrst í Morgunblaðinu 29. júní 2023.
Það er margt sem ég fæ ekki til að hanga saman í þessu narratívi en eitt af því er: Hvernig er hægt að kalla Covid veiruna lífefnavopn í einu orðinu og vísa á greinar sem fjalla um hversu hættuleg hún er en gagnrýna síðan í hinu orðinu að það hafi verið gripið til aðgerða til að verja fólk gegn henni.