Flestir Íslendingar hafa heyrt um Alþjóðaheilbrigðismálastofnunina (WHO). Okkar heittelskaði fyrrverandi sóttvarnarlæknir, Þórólfur Guðnason, apaði eftir nánast öllum þeim ráðleggingum sem komu frá þeirri yfirþjóðlegu stofnun á covid tímanum. En fæstir vita hversu áhrifarík þessi stofnun er og að hún á eftir að verða enn valdameiri ef viðbætur við núgildandi alþjóða heilbrigðisreglugerðina, IHR (International Health Regulations), verða samþykktar.
Opinbera sagan er að reglugerðin hafi upphaflega verið samþykkt til að staðla viðbrögð ríkja við plágum. Það þýðir ekki að WHO hafi fengið geigvænleg völd á veirutímum, heldur höfðu þeir umboð til að miðla upplýsingum og ráðleggingum til ríkja.
Nú virðist breyting á því fyrirkomulagi vera í uppsiglingu. Nokkur ríki komu fram með viðbætur við reglugerðina sem var síðast uppfærð árið 2005. Þessar nýju viðbætur eru vægast sagt óhuggulegar. Orðalagið hljómar eins og tilskipanir og eiga að ganga á sjálfsákvörðunarrétt þjóðríkja á svokölluðum „neyðartímum“ – en stofnunin fær að skilgreina hvað það er. WHO mun þó ekki formlega fá þetta vald, heldur verður hverju ríki skipað að stofna svokallaða „National IHR Focal Point“ (gr. 4 IHR*) sem mun fara að vilja WHO.
Nokkrar þessara viðbóta eru:
1) Breyting úr ráðgjöf í tilskipun: Breyting á eðli Alþjóðaheilbrigðismálastofnunarinnar úr ráðgefandi stofnun sem gefur aðeins ráðleggingar til stjórnunaraðila, yfir í stofnun sem gefur út lagalega bindandi yfirlýsingar. (1. gr. og 42. gr. IHR*)
2) Alræðisvald vegna „mögulegra“ neyðartilvika: Gildissvið alþjóðlegu heilbrigðisreglugerðanna er stórlega víkkað til að ná yfir aðstæður sem geta aðeins hugsanlega haft áhrif á lýðheilsu. (2. gr. IHR*)
3) Mannréttindi víkja úr vegi: Það stakk höfund í augun að viðbótaskjal IHR strikar yfir núverandi reglugerð sem að tekur það skýrt fram að það eigi ávallt að standa vörð um mannréttindi og að þau eigi aldrei að víkja úr fyrirrúmi. Það er alveg á hreinu að hver sá sem vill afnema það fyrirheit vill ekki gera fólki gott. (3. gr. IHR*)
4) Skömmtunarhagkerfi: Framkvæmdastjóri WHO á að fá stjórn á framleiðsluvörum með „úthlutunaráætlun fyrir heilbrigðisvörur“ til að skylda aðildarríki til að afhenda vörur til að berjast gegn heimsfaraldri eins og þörf krefur. Hvað þýðir þetta nákvæmlega? Það má lesa úr þessu að markaðshagkerfi gæti liðið undir lok undir þessum „neyðarreglum“. Þá tæki við skömmtunarhagkerfi að sovéskri fyrirmynd. (44. gr. IHR*)
5) Þvingaðar læknismeðferðir: WHO mun fá vald til að krefjast læknisskoðunar, sönnunar á fyrirbyggjandi meðferð, sönnunar á bólusetningu og framkvæmd á samskiptaeftirliti, sóttkví og læknismeðferð. (18. gr. IHR*)
6) Stafrænir (og útprentaðir) hlýðnispassar: Innleiðing alþjóðlegs heilbrigðisvottorðs í stafrænu formi eða pappírsformi, þar á meðal á læknisvottorði, bóluefnavottorði, vottorði um fyrirbyggjandi aðgerðir, batavottorði, eyðublöðum fyrir staðfestingu um dvalarstað á ferðalögum og heilsufarsyfirlýsingu ferðafólks. Við sáum hvernig þetta fór fram í kóvíðinu: þetta er yfirskin til að koma á eftirlitssamfélagi. Ekki falla fyrir þessum yfirborðskenndu afsökunum. (18. og 23. gr. IHR* en einnig viðaukar 6 og 8 í IHR*)
7) Fullveldismissir: Gæfi neyðarnefndinni vald til að hnekkja lýðheilsuákvörðunum fullvalda ríkja og gera ákvarðanir neyðarnefndarinnar bindandi. Við hefðum ekkert um þetta að segja ef við samþykkjum viðbæturnar á samningnum. (4. gr. IHR*)
8) Óútreiknanlegur kostnaður: WHO áskilur sér rétt til að dreifa milljörðum dollara til sjúkrahús-neyðar-iðnaðarsamsteypu lyfjafyrirtækjanna án kröfu um reikningsskil. (gr. 44A IHR*)
9) Málfrelsi afnumið: Veruleg aukning á getu WHO til að ritskoða það sem hún lítur á sem „rangar upplýsingar“ og „falsréttir“. Hvernig ætla þeir sér að gera það? Munu þeir hafa vald til að loka lénum? (e. domains) eða rásum/aðgöngum á samfélagsmiðlum? Það er klárt mál að málfrelsið er í hættu. (44. gr. og viðauki 1 IHR*)
10) Þvingað samstarf: Skapar skyldu til að setja á laggirnar, útvega og viðhalda IHR (International Health Regulations). Þessi viðbót gerir WHO kleift að komast hjá ábyrgð því að þjóðríkin sjálf munu sjá um að kúga fólkið í landinu. (Viðauki 10 IHR*)
Allt friðelskandi og frelsisunnandi fólk ætti að mótmæla þessum viðbótum við IHR. Það er ljóst að það þarf að endurskoða veru Íslands í WHO ef að stofnunin er orðin svo gráðug og valdasjúk. Það þarf meiri umræðu um hverjir fjármagna þessa stofnun og hvaða hagsmunir eru þarna að baki.
Að lokum leggur höfundur til að fólk skoði boðaðar uppfærslur/viðbætur við IHR. Einnig er áhugavert að skoða blogg James Roguski sem vinnur mikilvægt verk við að upplýsa heimsbyggðina um áform WHO: https://substack.com/@jamesroguski
*Amended IHR: https://jamesroguski.substack.com/p/read-the-damn-documents
(Undir #2 sjáið þið skjal merkt „51 Page Article By Article Compilation Of The Proposed Amendments To The Ihr“)
